४ बैशाख २०८१, मंगलवार
बि प्लस नेपाल
भानु प्रताप राना,धनगढी
दिना इतबार रानाथारुकी एक तिउहार हए । जा तिउहारसे तमान आदमी बिना इतबार फिर कहात हएँ । जा तिउहारके भादँवकी उजियारीकी पहिलो इतबारके मानत हँए । जामे छोटे बच्चा बच्चीसे लैके बडे बुड्ढा बुढीया तक कोइ फिर बर्त बैठ सकत हएँ । जा तिउहारमे जुरीया राटी, पुरी औ सिमही खास पकवान मानो जात हए ।
मानव जिवनमे रोगब्यादी सतात हएँ । फुरीया, फुसरी, कजीया औ दुखौनु ना होमय कहिके अपन सबसे जद्धा मानन् बालो भगमानकी पुजा करके जा बर्त बैठत हएँ । जा बर्त बैठनबाले आदमी खटिया,पलखियामे ना बैठत हँए जा दिन मुदरामे बैठत हएँ । चौमासो मे फरेभए खिरा जा बर्त खोलनसे पहिले ना खाव करत हएँ । साझके अगीयारी करके जा बर्त खोलत हएँ ।
दिना इतबार की बिना इतबार कहिके आदमी बिबादित दिखात हएँ पर जे दुने एकए हएँ । काहेकी कुइ कहात हएँ जा बर्त दुखिया आदमी रहात हएँ दीन दुखि आदमी जा बर्त बैठत हएँ तबही जा दीना इतबार हएँ । कुइ कहात हएँ की दिना इतबारके दिन सूर्यनारायण देवताकी पुजा होत हए । सूर्यसे रानाथारु दिन कहात हएँ तबही जा दिना इतबार हए । कुइ कहात हँए की अट्टमीमे भगमान श्री कृष्ण मुठी भर जाडो छोडत हए औ बिना इतबारमे बेना भर जाडो छोडत हए तबही जा से बिना इतबार कहो जात हए । तौ कुइ कहात हँए की जा दिन सबेरे उठके गेहुँ मैसे जौ और अकरा बिन बिनके छाटत हँए तबही जा बिना इतबार हए । नाँव बिना इतबार या फिर दिना इतबार जो होएसे फिर मुल्य मान्यता एकए हए । एकए तिउहार ठिहा हिसाबसे इकल्लो नाँव थोरी फरक हए रानाथारु अगुवा बतात हएँ ।
दिना इतबार व्रत बैठन का का चाहत हए ?
१. कन्डा
२. घ्यू
३. लौङ्ग
४. खिरा
५. जुरिया रोटी
६ं. सिमही
भादँवकी उजियारीकी पहिलो इतबार जा साल भादँव २७ गते बिना इतबार पडत हए । जा दिन चौधरी थारु समुदाय अटवारी मनात हए । अटवारीकी सरकार सार्वजनिक विदा देत हए, जा अच्छी बात हए । पर दुखकी बात जा हएकी सुदूर पश्चिम प्रदेश सरकारके जहे दिन माननबाले बिना इतबार नजर ना आत हए । जामे हमरु कमी कमजोरी हए ताकी हम खुद जाके ताँही अवाज नउठाए । हम सरकारके कभु ध्यान आकर्षण ना करबाए हएँ ।
