२८ बैशाख २०७८, मंगलवार
बि प्लस नेपाल

जनगणना २०७८ मे हौँस्यार बनएँ

Narayan Rana २८ चैत्र २०७७, शनिबार
जनगणना २०७८ मे हौँस्यार बनएँ

जनगणना २०७८ मे हौँस्यार बनएँ ।
जा जनगणना पहिलेसे जद्धा जरुरी औ अलग कैसे हए?

नेपालमे हर १० सालमे जनगणना होए करे कर्त हएँ । ऐसिएमे आनिया २०७८ साल फिर जनगणनाको बर्ष हए । वि.सं. २०७८ जेठ २५ से ८ तक देशभरेक मनैन्की गिन्ती सुरु होनबाली हए मनैन्की गिन्ती इकल्लि नाए मनैनको जात, धर्म, भाषा, लौँडालौंडिया–लोग बैयर, पढाइलिखाइ, उमर जैसे बहुत मेलको तथ्याँक एकए चोटी भरेजात हएँ । वि.सं. १९६८ से नेपालमे सुरु भओ राष्ट्रिय जनगणना जा चोटी २०७८ मे १२औं चोटी होबैगो जा चोटीको नारा हए “मेरो जनगणना मेरो सहभागिता” हमर जैसे हर क्षेत्रमे पछेले औ जनसंंख्यामे कम्ती बाले समुदायके ऐसे जनगणना औरु जद्धा जरुरी हए तभिमारे सबएजनी जा जनगणनाके एक मौका मानके सहिसे तथ्याँक लिखबान ताहीँ सहयोगी बनए कहिके जा अंकमे जा लेख समेटे हएँ ।


१० बर्षे संघर्ष पिच्छ् शान्ती प्रकृयाके बाद नेपालमे पहिलो चोटी संविधानसभासे बनो संंविधान लागू भएबाद जा जनगणना पहिलो चोटी हए तभिमारे जा बहुप्रतिक्षित औ अलग हए । संविधानको नयाँ शासकिय संरचना अनुसार ७ प्रदेश, ७७ जिल्ला, ७५३ स्थानिय तह, ६ हजार ७४३ वडा हएँ । अभेको संविधान अनुसार देश समानुपातिक समावेशी हए जो को सबन्से जद्धा बडो अधार जनसंंख्या हए । जहेको तथ्याँकके अधारमे समानुपातको हिसाबकिताब होनबालो हए , औ हरेक क्षेत्र, निकायमे समावेशी निति अनुसार देशको व्यवस्थामे बदलाव आबैगो हमरो आसरा हए । तभिमारे अपनो तथ्याँकमे सहि सही तथ्याँक लिखबान हमर अनुरोध हए ।
हमर रानाथारु समुदायके जाहीँ जा जनगणना औरु जद्धा जरुरी जा मारे हए कि नेपालमे हम पुराने बासिन्दा हुइके फिर अभेतक हमर गिन्ती थारुमे होत आओ रहए । थारु तथ्याँकमे पुरो रानाथारुनकी गिन्ती हरानिकमारे आजतक रानाथारुको संख्या कितका, रानाथारु भाषा कितका मनै मस्कत हएँ? कुइ कहिदेत ता उत्तरके ताहीँ अनुमानसे अलावा कोइ बिकल्प नैया । पारसाल भर्खरए २०७७ कातिक महिनामे रानाथारु भाषा सुचिकरण भओ ऐसिए २०७७ माहमे आदिवासी जनजातीमे सुचिकरण, जे हमर समुदायकी संविधान सभाकी सबसे बडि उपलब्धी मानके घर घर खुसियाली मनाएडारे पर सुचिकरण होतए सबकुछमे बदलाव लानताहीँ सहि तथ्याँककि जरुरत पडत हए, अनुमानसे अब काम चलनबालो नैया तभिमारे कम्तिमे जा जनगणनामे अपनी जाती, भाषा ना सरमाएके, ना हडबडाएके सही सहि फारममे संख्या लिखबादेन अनुरोध करत हएँ जा हमर सन्तानके ताहीँ अवसर हए । ऐसे अवसर घरी घरी ना आत हएँ ।


जा सालको जनगणना पहिलेसे कुछ अलग होबैगो पहिले मास्टर जगनणना करेकर्त रहएँ जा चोटि सरकार ९ हजार सुपरिवेक्षक औ ४३,२७७ जनि गणक तीन महिनाके ताहीँ भर्ना हुइरहे हएँ । जा चोटी जनगणनामे सामुदायिक प्रश्नावली थप हए जो मे मृत्यु, रोजगारी, वडा कार्यालयसे पाओ सुविधा, विपत्, वडामे उत्पादन भए चीझ, बडासे बाहीर जानीया चीझ, आम्दानी जैसे थप प्रश्न हएँ । स्थानिय तहके विस्तृत जानकारी औ योजनाके ताहीँ जा सामुदायिक प्रश्नावली तयार करोगओ हए जो वडा अध्यक्ष औ वडा सचिवके रहोवरमे भरोजाइगो कहिके विभागके निर्देशक ढुण्डीराज लामिछाने बताइ हएँ ।
नयाँ संरचना, नयाँ जनगणना औ हमर बीसौँ बर्षको सुचिकरणको मुद्धाके सकार रुप देन ताहीँ, समानुपातिक समाबेशीमे रानाथारुके समावेशी बनान जाती, भाषा सबएके सही सहि लिखबान सबको दायित्व हए तभिमारे जा चोटी होनबालो जनगणनाको महत्व बूझके रानाथारु तथ्याँक सहीसे समेटन औ सिमटबान सहयोग करन नेपाल रानाथारु समाजके महासचिव भक्तराज राना अनुरोध फिर करि हएँ ।

औ रानाथारु भीतरकी (उपजाती) मे राना ठाकुर,बट्ठा राना, ढंग्रा÷धनगरा राना, गिरी राना, जिरी राना, बिसेना राना, भट्ट राना, राउल राना, बडायक, गुन्नीयाँ, जुगिया राना, गुलजहरीया, देउवा राना, खिप्ता÷खप्टा राना, राउत, उल्टहुवा मिलाएके १६ कुरी बाले फिर अबको जनगणनामे रानाथारु भीतरकी उपजातीमे तथ्याँक लिखबान अनुरोध करत हएँ ।

सभारः उजियारो रानाथारु पत्रिका २०७७

  • 292
  •  
  •  
  •  
  •  
  •  
  •  
    292
    Shares
  •  
    292
    Shares
  • 292
  •  
  •  
  •  
  •  
सुदुरपश्चिम प्रदेश धनगढी, कैलाली
9800639387,9812622235, 9814620010,
bplusstudio7@gmail.com

बि प्लस नेपाल टिम

अध्यक्ष

भानु प्रताप राना

सम्पादक

भक्तराज राना

प्रवन्धक

हरद्वारी राना

व्यवस्थापक

नारायन राना

संबाददाता

सुरज राना

श्रीशा राना

सतेन्द्र राना

सेवाराम राना

सामाजिक संजाल