११ माघ २०८१, शुक्रबार
बि प्लस नेपाल
कञ्चनपुरकाे लालझाडी गाउँपालिका- १ का ४५ वर्षीय रमेश बडायक दम्पतीकाे हत्या आराेपमा प्रहरीले एक जनालाई पक्राउ गरेकाे छ ।
९ कार्तिकमा धारिलाे हतियार प्रहार गरि बडायक र उनकी ४१ वर्षीया श्रीमती कमलाको हत्या गरेकाे अवस्थामा घरमै शव भेटिएको थियाे ।
उनीहरूकाे हत्यामा संलग्न भएकाे पाइएपछि लालझाडी गाउँपालिका-२ बस्ने ५० वर्षीय गंगाराम रानालाई पक्राउ गरिएको कञ्चनपुरका प्रमुख प्रहरी उपरीक्षक(एसपी) चक्रराज जाेशीले जानकारी दिए ।
उनकाअनुसार रानालाई पक्राउ गरेर घटनाबारे अनुसन्धान भइरहेको छ । प्रारम्भिक बयानका क्रममा रानाले बडायक दम्पतीकाे हत्या गरेकाे स्वीकार गरेका छन् ।
८ कार्तिककाे राति मदिरा सेवन गरेर बडायककाे नास्ता पसलमा पुगेका रानाले मदिरा नदिएकाे निहुँमा आवेशमा आएर धारिलाे हतियार प्रहार गरि हत्या गरेकाे बयान दिएका छन् ।
“एक क्वाटर दिनुहोस् भनेर बडायककाे पसलमा पुगेकाे थियाे । उनले छैन् भनेर तथानाम गर्दै ममाथि हातपात गरे,” रानाले बयानमा भनेका छन्, “तलाई देखाउँछु भनेर हान्ने चिज खाेज्दै थिए । त्यही बेला नजिकै काठकाे डन्डा पाएपछि बडायकलाई हिर्काएर बेहाेस् बनाए । त्यसपछि त्यही भेटिएको धारिलो हतियारले प्रहार गरे ।”
बडायककाे हत्यापछि घरकाे बरण्डामा झुलभित्र सुतिरहेकी उनकी श्रीमतीको पनि हत्या गरेकाे रानाले बताएका छन् ।
कञ्चनपुर प्रहरीले याे घटनामा प्रदेश प्रहरी कार्यालयसँगै नेपाल प्रहरीकाे केन्द्रीय अनुसन्धान ब्युराे सीआईबीकाे टाेलीसँग पनि प्राविधिक सहयोग मागेकाे थियो ।
